ნათია თურნავა - მსოფლიო საფოსტო კავშირის მუდმივმოქმედი საბჭოების წევრ სახელმწიფოდ საქართველოს მეორე ვადით არჩევა არის ჩვენი ქვეყნის საერთაშორისო აღიარება საფოსტო სექტორში რეფორმების განხორციელების მიმართულებით

„გაეროს მსოფლიო საფოსტო კავშირის მუდმივმოქმედი საბჭოების წევრ სახელმწიფოდ საქართველოს მეორე ვადით არჩევა არის ჩვენი ქვეყნის საერთაშორისო აღიარება იმ რეფორმების განხორციელების მიმართულებით, რომელთაც საქართველო საფოსტო სფეროს განვითარებისა და საფოსტო მომსახურებების სრულყოფის კუთხით ახორციელებს. ეს აღიარება ხელს შეუწყობს მსოფლიო საფოსტო ინდუსტრიის საერთაშორისო მოთამაშეებს, მეტი ინტერესი გამოიჩინონ საქართველოს, როგორც საფოსტო მომსახურების რეგიონული მნიშვნელობის ცენტრის, განვითარების მიმართულებით,“ - ასე შეაფასა ეკონომიკისა და მდგრადი განვითარების მინისტრმა ნათია თურნავამ გაეროს მსოფლიო საფოსტო კავშირის მუდმივმოქმედი საბჭოების წევრ სახელმწიფოდ საქართველოს მეორე ვადით არჩევა.

არჩევნები  მსოფლიო საფოსტო კავშირის (UPU) 27-ე კონგრესზე გაიმართა, რომლის მუშაობაში მონაწილეობდა ორგანიზაციის 192 წევრი სახელმწიფოს, მათ შორის, საქართველოს დელეგაცია. მომდევნო ოთხი წლის მანძილზე საქართველო UPU-ს მუდმივმოქმედი საბჭოების - ადმინისტრაციული და საფოსტო საექსპლუატაციო საბჭოების  წევრი იქნება.

ნათია თურნავას განცხადებით, ამ გადაწყვეტილებით საქართველოს მიეცემა შესაძლებლობა, მეტად ჩაერთოს საფოსტო სფეროსთვის მნიშვნელოვანი გადაწყვეტილებების მიღების პროცესში, რათა გათვალისწინებული იყოს საქართველოს ინტერესი საფოსტო სფეროს განვითარების პრიორიტეტების დასახვისას, აგრეთვე  მიიღოს მეტი ტექნიკური დახმარება მნიშვნელოვანი პროექტებისა და საფოსტო სფეროს განვითარებისთვის.

აღნიშნული საბჭოები, UPU-ს მომავალ კონგრესამდე 2025 წლამდე პერიოდში წარმოადგენს მსოფლიოში ფოსტის სფეროს განვითარების და სრულყოფის უზრუნველმყოფ UPU-ს ძირითად არჩევით ორგანოებს.  ადმინისტრაციული საბჭო (CA) წარმოადგენს UPU-ს ადმინისტრაციული და პოლიტიკური გადაწყვეტილებების მიღების ბირთვს. ადმინისტრაციულ საბჭოში (CA) წევრობით მომავალი ოთხი წლის განმავლობაში საქართველო მნიშვნელოვანი გადაწყვეტილებების შემუშავებასა და მიღების პროცესის უშუალო მონაწილე იქნება.